فنان شهير يكشف باكياً عن معاناته المادية (فيديو)

كشف الفنان إسماعيل فرغلي خلال استضافته ببرنامج الستات، الذي تقدمه الإعلاميتان مفيدة شيحة وسهير جودة عبر قناة النهار، عن موقف صعب، تعرض له، ومعاناته من ضيق الحال؛ قبل أن يفتح الله له باب رزق جديداً، من خلال المشاركة في برنامج المقالب: “حسين على الهوا”، كما تحدث عن دعم زوجته له في هذه المحنة؛ إذ لم يكن يمتلك مالاً من أجل شراء طعام لأسرته.

وقال فرغلي: “كان فيه قصة في اليوم ده، في اليوم اللي جالي فيه برنامج حسين ع الهوا؛ كانت بنتي نرمين دي لسه في كي جي وان، وخلاص في اليوم ده مكنش معايا جنيه في جيبي، قعدت أنا ومراتي ندور في البيت كله على أي فلوس، جنيه أو نص جنيه أو حتى ربع؛ لحد ما جمعنا بالعافية تمن علبتين كشري، أقسم بالله.

وتابع باكياً: “جبنا علبتين كشري، سيبنا واحدة للبنت، وقعدت أنا ومراتي ناكل في العلبة التانية، وهي في نص العلبة؛ تقول: الحمد لله، عشان تسبيلي الباقي أكله، وقاعدة تطمني، وتقولي إن شاء الله ربنا هيكرمنا، وفي الوقت ده؛ يرن تليفون برنامج حسين ع الهوا، كان التليفون لما يرن أطلع اجري عليه، عشان مفيش رصيد معايا أكلم حد من عندي، المهم، قالولي عايزينك في مكتب طارق نور، في شارع نوال، وأنا في آخر البحر الأعظم”.

وأضاف: “نزلت طبعا مش معايا فلوس آخد تاكسي، ووصلت المكتب، ومضيت العقد، وخدت عربون 200 جنيه؛ كانوا رقم وقتها، رجعت البيت وفرحت مراتي، وقلت لها: ربنا سمع دعاكي وكرمنا، قالتلي إيه اللي حصل، قلت لها: هنطلب كمالة”.

يذكر أن الفنان إسماعيل فرغلي، شارك في الموسم الرمضاني الماضي في مسلسل “مكتوب عليا”، وهو من بطولة أكرم حسني، أيتن عامر، هنادي مهنا، محمود السيسي، عمرو عبد الجليل، حنان سليمان، وإخراج خالد الحلفاوي، وتأليف إيهاب بليبل.