تامر حسني يطلق مبادرة لعلاج هذا المرض الخطير (فيديو)

قرر الفنان تامر حسني إطلاق مبادرة جديدة لمساعدة المرضى في مصر، وذلك بعد أن ظهر اليوتيوبر الشهير حسين الجوهري، في برنامج “حديث القاهرة” الذي يقدمه الإعلامي خيري رمضان عبر قناة “القاهرة والناس”، حيث ناشد تامر لدعم مزاد خيري لمساعدة الطفلة رقية المصابة بمرض ضمور العضلات.

ونشر تامر على حسابه الخاص بـ”إنستغرام” مقطع فيديو من لقاء اليوتيوبر وعلق عليه قائلاً: “يا حسين يا حبيبي أنا معاك وبدعمك وبدعم حملتك الإنسانية السامية وسلامي لصديقي وحبيبي أستاذ خيري رمضان وعندي فكرة أتمنى رعايتها ودعمها من أجل كل مريض فكرة مش هتخلي مريض واحد في مصر يمد إيده لحد”.

وتابع: لو مليون مصري اشترك فيها هنحل أزمة الأمراض المكلفة في مصر كلها، مليون مصري بس من الـ120 مليون مصري هيتطوعوا على حساب معين للتبرع وهيكون في لجنة مسؤولة من جهة رسمية مسؤولة في الدولة بتقييم الحالة ماديا والمليون مشترك دول هيكونوا بيتبرعوا بشكل دائم كزكاة عنهم وعن أولادهم لخدمة مجتمع كامل وممكن نسميها مثلاً صفحة المليون أخ”.

وأكمل: “كل ما تظهر حالة محتاجة رقم صعب الصفحة هتدرسها وتعلن عن الحالة وتكلفتها التبرع هيبقى في حدود من20 جنيه لـ40 حسب الحالة بس ساعتها أول ما هنعلن هنجمع الفلوس في ثانية لكل المحتاجين وكل المقتدرين اللي ربنا هينور قلوبهم وهيشتركوا في الحساب ده مش هيحسوا أنهم دفعوا حاجة بس هينقذوا حياة أطفال كتير وناس كتير محتاجة، ومين عارف جايز الفكرة دي تخلي مفيش ولا واحد مريض في مصر مش لاقي يتعالج وجايز المليون مشترك يكتروا، والله والله والله دي فكرة بسيطة مش هتكلف حد بس هتخدم ناس كتير هتخدم بلد هتخدم كل المحتاجين ونخليهم ميمدوش إيديهم لحد يكسفهم، ربنا خلقنا عشان نساعد بعض وزي ما علمنا رسولنا الكريم.. خير الناس أنفعهم للناس يعني ربنا بيحب الناس اللي بتنفع الناس وأي صدقة بتخرج من أي حد مستحيل تنقص ماله بالعكس هيضاعفها ربنا في رزقه وهيكرمه ويطهره ويرفع عنه بيها يارب الفكرة دي تتحقق.