تامر حسني لمعجب اتهمه بالتجاهل انشف يا ولد

رد الفنان تامر حسني على أحد معجبيه، والذي اتهمه بتجاهله في آخر حفلاته التي أحياها بمدينة العلمين احتفالا بصدور ألبومه الجديد عشأنجي.

ونشر أحمد حمادة الذي يصف نفسه باسم مطرب المترو عتابا لتامر حسني عبر حسابه الشخصي على فيسبوك، أكد فيه أنه تعب للوصول إلى حفله ولكنه تجاهله.

وكتب المعجب: “الناس كلها في حفلة تامر حسني، لما لقيتني بحاول أوصل له، شالوني وندهوا على تامر وقالوا له وما عبرش، أنا كنت بموت نفسي ربنا يعلم روحت إزاي؟ كنت بحاول الأخذ بكل الأسباب، الناس قالت لي كتير، روح له يمكن، اتبهدلت ولا استمتعت دقيقة، عشان كان نفسي في حاجة مش رايح حفلة، أنا رايح أحقق هدف ليا”.

تابع المعجب: “ومع ذلك نزلت صورة، لقيت اللي بيقولي معاك فلوس تروح حفلات والشباب مش لاقي، والله أنا رايح هدية، حتى السفر رايح جاي ربنا يعلم بتعب وبعافر على حلمي إزاي؟ مطلبتش مساعدة حد يبقي متكسروش فيا”.

من ناحيته أكد تامر حسني أنه لم يتجاهل المعجب، ولكنه لم يعلم بوجوده من الأصل بسبب ضيق الوقت وازدحام المكان والأضواء المفتوحة في كل مكان.

وقال تامر حسني: “يا حبيبي يا أحمد قرأت كلامك، مسمهاش معبرش، اسمها مشافش، أو ما أخدش باله في وسط الآلاف دي كلها، واللي متعرفوش بس إن شاء الله هتعرفه لما ربنا يكرمك وتنجح وتقف على مسرح، إن معظم الوقت النور بيبقى في وش المطرب، ممكن أكون باصص في اتجاهك بس مش شايف التفاصيل”.

تابع تامر حسني مطالبا المعجب بإرسال صوته وعدم التحامل عليه: “معبرش دي لما يكون في ميعاد مسبقاً بينا ومهتمش، ولازم أنت تعرف حاجة مهمة، حفلة الألبوم تحديداً بتبقى محسوبة بالثانية، عشان أغانيها كتير، ابعت لي صوتك اسمعه، وأكيد طالما أنت عندك كل الطاقة دي يبقى صوتك جميل”.

أكمل تامر حسني: “ويا سيدي سهلة وملحوقة، وأوعى تزعل من اللي اتريقوا عليك، لأنهم سبب إن صوتك يوصل لي، عسى أن تكرهوا شيئا وهو خير لكم، انشف يا ولد يلا ابعتلي صوتك فورا”.

يذكر أن تامر حسني احتفل مؤخراً بإطلاق ألبومه الجديد عشأنجي، في مدينة العلمين الجديدة بحضور عدد كبير من النجوم والمعجبين، وكانت أبرز الحضور الفنانة هنا الزاهد التي شاركت تامر حسني الرقص أثناء غنائه.

وكان تامر حسني وهنا الزاهد قد تشاركا بطولة فيلمه الجديد بحبك، مع هدى المفتي والفيلم تأليف وإخراج تامر حسني.