نيللي كريم: السيدات أصبحن “رجالة البيت” (فيديو)

خلال مقابلة لها مع منصة “شاهد” الإلكترونية، كشفت الفنانة نيللي كريم تفاصيل شخصيتها في مسلسلها الجديد “ليه لأ 3″، والذي من المقرر عرضه في 22 حزيران (يونيو) الجاري عبر المنصة.

وقالت نيللي: “أنا بقدّم دور “شيري” وهي أم لطفلين، وبتشوف إيه اللي بيحصل من مشاكل في العيلة دي في فترة زمنية معينة، وهي شخصية حقيقية موجودة معانا ووسط أصحابي وبنشوفها كتير”.

وعن وجه التشابه بين شخصيتها في المسلسل، وشخصيتها الحقيقية، علّقت قائلةً: “الحاجات المشتركة بما إني عندي أولاد وفي المسلسل كمان عندي أولاد فبسأل كتير عاملين إيه وبتعملوا إيه في الحياة؟ وبدّيهم نصائح كتير”.

وأضافت: “أزمة المسلسل إن الأم بتضحّي بحاجات كتير جداً علشان سعادة أولادها، وابنها بالتحديد لأن هنشوف تعامل الولد في الظروف اللي زي دي، خاصة إنه فاكر نفسه راجل البيت لأنه الولد، والأم بتحاول ترضيه بكل الأشكال ولكن هتيجي في نقطة بتقف وقفة مش عايزة حد ييجي عليها ولا هي تيجي على أولادها، وهنا نقطة التحول بتاعة المسلسل”.

كما تطرقت نيللي كريم إلى دور المرأة في الأسرة بعد الانفصال، قائلةً: “راجل البيت دي كلمة كبيرة أوي وأحياناً الناس بتستخدمها من غير ما تفكر، ودلوقتي في الزمن اللي إحنا فيه أو على الأقل العائلات اللي بشوفها حواليا الستات هي اللي بتبقى راجل البيت، الستات دلوقتي هي اللي بتشيل البيت والأولاد خاصة لما بيحصل حالة طلاق 99 في المية من الآباء مبيدفعوش الفلوس اللي عليهم وبيكونوا شايلين إيديهم حتى لو بيدفعوا بيدفعوا رقم ضئيل، فالست هي راجل البيت حالياً”.

واختتمت نيللي كريم حديثها قائلةً: “مش حاسة إن حد لازم يضحّي علشان حد، لو الأم بتقول أنا ضحيت بشغلي ومستقبلي علشان أربي ولادي طب ما الولاد بيكبروا وبيتجوزوا وبيروحوا، هيقولوا محدّش قالك تضحي، فيه فرضيات في التربية الشرقية ميتبنيش عليها عائلة سليمة ولا أفكار ولا حياة سليمة”.